Category: Umore apur bat

Galizian euskaraz

Euskarak ez dauka mugarik, ezta kolorerik ere,  nazioarteko hizkuntza da. Galizian poliziak senegaldar bat atxilotu eta gero horrek euskaraz deklaratzea eskatu zuela kontatuko banizue, burutik jota nagoela esango zenidakete, edo gutxienez, [Enlace roto.] kantariarekin klinika baten sartzeko desintoxikatzeko.

Baina jaun-andreok, pasadizo erreala da, eta xehetasun gehiago behar baduzue, berria [Enlace roto.]irakur dezakezue.

Patxi Lopezentzat ia 90.000€ jarri ditugu bi urtetan euskara ikas dezan, eta badator senegaldar bat eta lezioa ematen dio, aldarrikapen politiko eta guzti, hizkuntza eskubideak exijitzen.

Tira, egia da tipoa ez dela oso adibide ona, antza nahiko biolento jarri baitzen, baina euskararen “Malcolm TX” deituko bagenio, umore apur bat gehiago sartuko genioke jazotakoari.

Bakarrik falta zaigu Espainiako komunikabideek berria zein tonutan hartuko duten ikustea: irribarrea alterako zaie ala aprobetxatu egingo dute eta euskararen aurkako gerran beste harri koskortxo bat jarri? Espero dut halako lerrobururik ez irakurtzea: “Frogatuta geratu da euskara eta kale borrokaren arteko lotura zuzena”.

Denborak esango digu, baina zuek, o arima garbiok, bota itzazue barre batzuk bitartean.

Gora euskal pornoa!

Sareak, apika, altxorrak eta sorpresa bikainak uzten dizkigu, eta kasu honetan sorpresa hori bikoitza izan da. Alde batetik, deskubritu egin dugu sexua ez dela tabua Euskal Herrian, eta bestetik, euskaldunok Estatuan izan dezakegun indarraren erakusketa txikia eman dugu.

Twitter sare soziala gora doa, gero eta erabiltzaile gehiago dauzka eta informazioa argiaren abiaduran igarotzen zaigu begien aurretik. Tresna horren bidez, Jozulin blogariak euskarara bikoiztutako film batek zein izenburu eduki lezakeen hipotesitik abiatuta, #euskalporn gaia asmatu zuen atzo eta sarea zoratu egin zaigu. Gaur, euskal umorea nagusitu egin da Espainiar Estatuan: #euskalporn gaia Estatuko gai iruzkinduenen artean kokatu da (trending topic) irudiak erakusten duen bezalaxe:

%80an euskaraz idatzitako mezuak gai nagusi dira oraindik, lerro hauek idazten ari naizen bitartean. Ahuntzaren gauerdiko eztula dela esan dezakezue, baina euskara erdaldunengana hurbiltzeko aurrera pausu galanta eman dugu beharbada euskal internautok, erdaldunek kuriositatea azaldu dutelako honakoa bezalako mezuekin:

Euskara ikuspegi positibo batetik begiratu diote kanpotik, umorea eta bat batekotasunari esker. Sarea oraina eta etorkizuna da, eta euskarak badu indarrik bertan biziraun eta hari esker hazten jarraitzeko.

Egutegian, otsailaren 17a #euskalporn eguna bezala ezagutu beharko genuke. Zorionak euskal internauta eta lagunok!

Bukatzeko, arrakastaren harri koskorrak izan diren esaldi batzuk utziko dizkizuet, barrez lehertzeko modukoak. Twitter badaukazue, bide batez, ondo apuntatu euskal tuitero hauen izenak eta jarrai itzazue:

@jozulin: aluan gora, aluan behera, aluan gora semena

@Marrubiizozkia: Isuri beltza ona duk baina, xuria berriz hobia, txortan ikasi nahi duen horrek, gure [CENSORED]tara begira

@theklaneh: Jan goikoa eta zakiltzarra

@barnetx: Patxik Loez, Frenillo Glande Meataska, Antonio Txortangoiti eta Iñaki Oheanzabal

@aitzolete: gora euskal gerria askatuta!

Joxe blogariak ere, Teknopatak, ekarpen ederra egin du Patxi Lopezek bere garaian “Yo es que soy de la margen izquierda, una zona donde no se ha hablado euskera nunca” bota zuenekoa gogora ekarriz:

@joxe: Yo es q soy de la Margen Izquierda, y alli nunca se ha hecho porno

Neronek ere ekarpentxoa egin nahi izan dut, ez dira besteak bezain onak, baina horietako baten lekukoa utziko dut nire txokoa den honetan:

@UgaitzZb: Fernando HorTente, Gorka Tiraiok, Andoni Biraola, Kaskarlos Gurpegi, Iker Mingain, HiHor HabilOndo, Markel Zurrupaeta.. Athletic Porn

Interneteko istorio politak. Gora Euskadi, Leñe!

San Ildefonsoko Patxi

Jakin badakigu lehendakariak 100 euroko [Enlace roto.] herritarren artean, 500.000 euro gastatu behar ditu horretan. Tira, 500.000 eta beste horren beste “neurria” iragartzen. Gainera, ez pentsa hauteskundeetan daukanik burua gure Patxik, ez horixe, gutxi gora behera hilabeteko epea utziko baitu zozketa egin eta hauteskundeak bitartean. Denbora sobera.

Nik galdera batzuk dauzkat lehendakari jaun agurgarriarentzat:

1. Non izango da zozketa? Koskojalesko Casa del Pueblon? Ala lehendakaritzan instalatuko da loteria-ontzia?

2. Familia bakar batek bonu bat baino gehiago  irabaz dezake ausaren magiaren eraginez?

3.  Zer merkataritza da dirua zozkatzen sustatzen dena? Ez al da hobe familien kontsumo ahalmena hobetzeko neurri eraginkorragoak bilatzea? (enplegua, behar duen jendearentzako gizarte laguntza…)

4.  Zer gertatuko da ikusten badut BMW eta Audia dauzkan auzokideari bonua egokitu zaiola eta niri ez zaidala deus ere jausi?

5. Zer gobernu klase da herritarren etorkizun eta arazoekin zozketak egiten dituena?

Horiek galderak, eta orain, ezkor galanta naizenik pentsa ez dezazuen, proposamen batzuk ere botako ditut Jaurlaritzaren aurrekontuan eraginik izan dezaketenak, baita ekonomia berraktibatzeko ere. Hona:

1. Gobernukideek (lehendakaria, sailburuak…) biluzik agertzen diren egutegia atera dezatela Korteinglesen atean saltzeko.

2. Txosna bat jar dezatela hiriburuetako Aste Nagusietan. San Ferminetan ere ausartuko balira, ez legoke gaizki.

3. Futbol partida bat joka dezala Eusko Jaurlaritzak Aldundien selekzio baten aurka. Diru apur bat ateraz gain, Patxi Lopezek aukera izango luke [Enlace roto.], bere ametsik beroena.

4. Aurtengo Euskal Encouterren, Aresekin koordinatuta, Ertzaintzak sarekada egin dezala pelikulak deskargatzen dituzten guztiak atxilotzeko eta isun lodikoteak kobratzeko.

5. “Lost” telesaila ikusi eta ondo ulertzeko maratoia ere antola dezake Patxik. Ez dakit honek zerbaiterako balio lezakeen, baina egun batzuetarako behintzat ondo okupatuta edukiko genuke gure “lunbreratxoa”.

Bestela ere, programarik ez dagoenean, beti geratzen da ondo urtegiren bat inauguratzea.

Ez horregatik, lehendakari.

Zure burua ezagutu: Gabonetako testa

1. Nor da abenduaren 24ko gauean etxeetan sartzen den gizon potoloa ikatza eta opariak banatzeko?

a) Olentzero, jakina.

b) Santa Klaus, miraquepreguntar…

c) Gure etxean paperik gabeko etorkinak sartzen dira bakarrik baimenik gabe.

2. Zein apaingarri erabiltzen duzu zure etxea atontzeko?

a) Eguzkilorea jartzen dut beti etxeko atean.

b) Zuhaitza, bolatxo gorriak, Santaklausa, Belena, eta txinatarren dendetan eros daitekeen edozein pitokeria.

c) Apaingarriak? Francoren erretratuari txanotxo gorria janzten diogu, eta nahiko da.

3. Zein da zure Gabon Kantarik gustukoena?

a) “Hator, Hator” eta “Oi Bethleem” artean zalantzan nago.

b) “Noche de Paz” edo “Holly Night”, bertsio originalean.

c)  “La Marimorena”, Lola Floresek kantatua, ahal bada.

4. Gabonetan inspiratuta dauden filmen artean, zein hautatuko zenuke?

a) ETBren aspaldiko “Olentzaro” film labur musikala, Gontzal Mendibilek kantatzen zuen hura.

b) “El Grinch”. Jim Carrey agertzen zen horretan, ezta?

c) Orain ez dut gogoratzen, baina seguru nago Pajaresek eta Estesok baten bat egin zutela.

5. Gabonei buruz irakurri duzun liburu edo pasarterik onena?

a) Kixmiren jaiotza, dudipez

b) “Cuento de Navidad”, Charles Dickensena.

c) “La Biblia”. AlabadoseaelSeñor.

6. Zer dira zuretzat Erregeak?

a) Espainol galantak.

b) Opari gehiago ekartzen dizkidaten pertsonaia maitakorrak.

c) Hirugarren Errepublikatik salbu uzten gaituztenak.

7. Zelan ospatzen duzu abenduaren 31?

a) Mendira igotzen naiz, normalean Gorbeiara.

b) Egun osoa ematen dut gaueko afaria prestatzen, eta gero xanpaina edaten dut. Baina ez gehiegi, lar tontotzen nau-eta.

c) Normaltasuna ekarri duen lehendakariaren hitzaldia jarriko dut, eta gero Erregearena ikusiko dut berriro, urtero grabatzen dut.

8. Zer opari eskatu duzu Gabonetarako?

a) Gabriel Arestiren antologia.

b) Bakea munduan, eta bueno… iPad bat. Hori garestiegia bada, Lady Gagaren diskarekin poz-pozik geratuko naiz.

c) Barbie Legionaria.

9. Zer edaten duzu Gabonetako afari, bazkari eta bestelako otorduetan?

a) TxakoliNa eta patxarana.

b) Xanpaina edo cava, dena delakoa, Freixenet hori.

c) Jerezeko ardoa, eta batzuetan gazpatxoa, kalefakzioa topera jartzen dugulako eta freskagarritxo bat hartzeko.

10. Zer da Gabonetan faltan botatzen duzuna?

a) Durangoko Azoka urtarrilaren 6 arte luzatzea.

b) Elurra, umeek atez ate Gabon kantak abestea… pelikuletan ikusten dudana.

c) Libertinaje gehiegi dago, duela 50 urte ez zen hori gertatzen.

EMAITZAK:

A erantzun gehiago: zure alboan Perurena espainol hutsa da. Garbi-garbi gordetzen dituzu euskal tradizioak, eta  Aita Barandiaranen lana hedatu eta perfekzionatzeko jaioa zara. Eztulak ere euskaraz ateratzen zaizkizu.

B erantzun gehiago: zu definitzeko badago ingelesezko hitz bat, doi-doia, “happy“. Telebista da zure gida, eta telebistako amerikanoak zure eredu. Modari jarraitzen diozu, edo ustezko modari, eta poz-pozik zabiltza hodei artean.

C erantzun gehiago: ai amatxo! Franco hil zenetik depresioan zaude. Biblia irakurtzen duzu gauero hildakoak berpizteko pasarteren baten bila. Fatxa galanta zara, burutik oinetara, eta Espainiaren kutsurik ez duen ezer erraietatik gorroto duzu. Zure baitan Gabonetako izpiritua bilatzea alferrik da.

OHARRA 1: ez baduzu umorez eta irribarrez irakurri sarrera hau, ez utzi iruzkinik, ez baita inor haserretzeko idatzi.

OHARRA 2: zure burua aurreko hiru kategorietariko baten islatuta ikusi baduzu… azkar! idatzi zerbait! Topiko baten alegoria zara.

Elkarrizketa: "Zulo 2.0"

Ugaitz: Egun on, Zulo jauna.

Zulo: Barkatu, andrea naiz, inporta ez bazaizu.

U: mmm… ejem! Jakina! Sentitzen dut, ez nekien, ohar hauek…

Z: Ez dio inporta, ez zara azkena izango, ohituta nago, oso andromorfoa naiz.

U: Eeeee, ez, tira, ez zaude txarto… hasiko gara elkarrizketarekin, ezta?

Z: Bai, hobeto, ordubete barru ordezkapen bat daukat Amorotoko ikastolan, lagun bati mesedea egin behar diot.

U: Zelan bizi duzu, eremu pertsonalean, azken egunotan zure inguruan sortu berri den [Enlace roto.]?

Z: Ba hiru eta bost urteko semea eta alaba dauzkat, hurrenez hurren. Haiengatik sufritzen dut nik. Zer esango diete eskolan? Ni ez naiz terrorista, ni bakezalea naiz, biktima bat naiz, erabili egin naute, eta iraganean pasa ditudan lotsa eta amorruari trufa egingo diete nire bi txikitxoen ikaskideek. MWAAAAA!!!!!

U: Ale, ale, pasa da… ez zaitez horrela jarri, emakumea. Tori mukizapia. Jarraituko dut. Ez al duzu uste oso aukera ona dela belaunaldi berrientzat? Hain zuzen ere, euskal herritar askok bizi izan duten infernuarekin sentibera daitezen.

Z: KAR KAR KAR KAR KAR!!!! Ai ama!!!! Zelako gauzak dauzkazun!!! Ekarri hona mukizapia berriro motel!! KAR KAR KAR!!!! Joeeeeeeee!!!

U: …

Z: Eeee, aaaa, mmmm… serio ari zinen??? – eztulak, zintz egiteak…– bai, bai, oso galdera interesgarria, bete-betean eman diozu. Sakoneko hausnarketa psikoantropologikoa egin dut eta gaiari hainbat buelta eman. Oso ondorio garbia atera dut: BURUTIK JOTA AL ZAUDE?

U: Errespetu pittin bat eskatu nahi nizuke, mesedez.

Z: Bai, bai, baina kolpe handia daukazu, medikuarengana joan, e? Falta barik.

U: Aintzat hartuko dut aholkua.

Z: Begira, edozeinek, zu barne, ulertzeko moduko azalpena emango dizut. Ikastetxeetan erlijio klaseak eman dira gehienetan, ezta? Kristautasun klaseak alegia, katolikoak.

U: Bai, bai.

Z: Zenbat igo da igandeetako mezetako asistentzia?

U: Ez dut uste hazkundea posititboa izan denik.

Z: To! Bete-betean berriro. Figura bat zara, e?

U: Zer esan nahi duzu? Neurri hauekin umeak aldendu egingo direla biktimek pairatutakotik ikasgela barruko beste asperkeria bat bezala ikus dezaketelako?

Z: Aizu! Zuloa baino ez naiz ni, e? Erantzunak sakon-sakonetik ateratzen zaizkit, baina uste dut zu beste zerbaiten bila zabiltzala. Niri Apaolazarrategitarren ardoa ondu eta gordetzeko ordaintzen didate orain, eta batzuetan ordezkapenak egiten ditut ikastetxeetan, modelo gisa. Ez naiz unibertsitate kumea, nik kalean ikasi ditut ikasi beharrekoak, eta gauza bat esango dizut…

(isilunea)

U: …

Z: Ez zait zure doinutxoa gustatzen.

U: Ondo da, barkatu, musika aldat…

Z: JA!! Hortxe duzu!! Oso azkarra zarela uste duzu, ezta? Nire lepora barre egingo didazula. Jai daukazu! Nik inoiz pentsa edo imajina zenitzakeen irudiak ikusi ditut, beldurrari begietara so egin diot eta mingaina atera, gau luze eta hotzak pasa ditut basoan galduta… zer irakatsiko didazu zuk niri? ZER?

U: Lasai zaitez. Amaitzen joango gara, arnas hartu… ooooso ondo, horrela. Bai, aurrera goaz.  Orduan zein aholku emango zenieke egungo hezkuntza arduradunei datozen belaunaldi berrien prestakuntzak hobera egin dezan?

Z: Yoga klaseak.

U: Yoga klaseak?

Z: Bai, yoga klaseak, gor ala? Baina ez umeentzat, haientzat baizik. Umeak oso pozik eta zoriontsu bizi daitezke kaletik korrika egiten, Nintendoarekin jolasean edo gurasoak nekatzen eta aspertzen. Baina mandatari hauek erlaxazioa behar dute, pentsamenduak zuri utzi, tira zuriago, eta bakea eman. Uf! Nekagarriak dira gero, e?

U: Beno, penitentzia moduan ez dago txarto, etorkizuneko bekatuak ere ondo zuritzeko. Amaitu dugu elkarrizketa edo dena delako hau, zerbait utzi al duzu esan barik?

Z: Ez. Barkatuko didazu, baina Amorotora joan behar dut, eta gero ea menditik pasatzen naizen, adarrak jausten joan zaizkit zulo-sarreratik eta biluzik sentitzen naiz. Badakizu, adinak ez du barkatzen.

U: Ba izan ondo. Eta batez ere, ez inoiz atzera bueltatu zure aurreko betekizunetara. Ardoak gordetzea oso lan duina da.

Z: Ez arduratu. Iragana atzean utzi nahi dut.

U: Milesker.

Z: Ale, bai, pesauuuu.

Eskuak gora! ETAkoa naiz.

Ezin izan diet gogoei eutsi, eta gaur [Enlace roto.] irakurri dudan gertakari baten gainean idazteko premia izan dut.

«Somos mienbros e ETA como digas o agas algun movinieto directamete vas a recivir un tiro en la cabeza. Gorka ETA M.»

Ohartxo hori utzi omen zion Filologian doktore izango den tipo batek Bilboko txinatar saltoki bateko dendariari. Txinatarrak, oharra ezin ulertuta (oso logikoa den bezala), ez zion mehatxuari jaramonik egin eta kanpora atera zen hieroglifikoa argitzeko laguntza eske.

Lapur proiektuaren aurpegia ikusi nahi izango nukeen une hartan, Leslie Nielsenen filmen bateko eszenen antz ikaragarria hartzen baitiot. Txinatarra laguntzeko agertu zen marokoarrak, antza, hobeto ulertu zuen bertan gertatzen ari zena eta “lapurra” neutralizatzea lortu zuten. Ertzaintzari deitu eta zoro hura atxilotu egin zuten.

Herri honek daukan zamarekin, eta oraindik ere burugabe batzuk horretaz baliatu nahi dira euren mozolokeria agerian uzteko. Barrez lehertzekoa da atzo Bilbon gertatutakoa, baina… Zer demontre dauka jendeak buruan????

Hori bai, El Correo irakurrita barre-algarak ezin eutsiz ibili naizen lehen aldiari omenaldia egin nahi izan diot sarrera honekin. 2010eko apirilaren 19a, egutegian gorriz markatzeko data.

Gorka ETA M. izenarekin sinatzen duen alproja hori ezagutzeak ere esperientzia mundiala behar du izan.

Erromatar hauek… burutik jota daude.